《畢加索—與亞洲對話》

《畢加索——與亞洲對話》

對上一次喺香港睇到畢加索嘅主題展覽已經係2012年喇，當年係响沙田文化博物館睇嘅。 雖然阿叔對當年嘅記憶同感受隨着歲月已然消逝，但慶幸香港文化博物館到今天依然屹立沙田。

13年後巴黎國立畢加索藝術館再次將畢加索作品帶到香港，不過今年嘅展覽場館就移師咗去西九龍M+。

今次展出畢加索作品有60多件，當中包括畫作、雕塑及陶瓷作品。 另外M+再加入130件自家藏品，全為深受畢加索作品所影響的當代藝術之作，出自三十位亞洲及海外亞洲藝術家之手。 並切合今次展覽主題；呈現出畢加索與當代亞洲藝術家嘅跨世代及文化對話。

所以場內充斥大量畢加索風格藝術品，可以襯機會考考大家眼光，試找誰是畢加索。

雖然官方稱有130件當代藝術家作品，係畢加索展品嘅一倍！ 但感覺上場內展品總數又唔似有咁多。 係嘅話主題係咪可以改做”亞洲——與畢加索對話“呢..

可能當時阿叔嘅注意力只留戀在畢加索作品啦，無法啦，時間有限，又唔見得會再入場二刷，唯有目標為本啦.. 而且與其從他人作品中觀察對方同畢加索對話，何不將自己精神同時間直接同現場嘅畢加索作品對話呢？

展館：M+

展期：即日至2025.07.13